Arsenal býður vonsviknum stuðningsmönnum á annan útileik

Forsvarsmenn Arsenal hafa ákveðið að bjóða stuðningsmönnum liðsins, sem ferðust til Manchester í gær, á annan útileik félagsins á tímabilinu. Arsenal beið lægri hlut gegn Manchester United 8-2 í leik liðanna á Old Trafford.

Talið er að um 3000 áhorfendur hafi ferðast með Lundúnarliðinu til Manchester en heildarveglengdin, fram og tilbaka, er um 650 kílómetrar.

Í yfirlýsingu frá félaginu segir meðal annars:

„Úrslitin á sunnudaginn voru mikil vonbrigði fyrir alla tengda félaginu. Stuðningsmenn okkar á vellinum voru þó frábærir allan leikinn og við viljum verðlauna þá fyrir frammistöðu sína. Við munum skrifa þeim fljótlega og útvega nánari upplýsingar."

Vængbrotið lið Arsenal sá aldrei til sólar í tapinu gegn United í gær. Stuðningsmenn liðsins létu þó vel í sér heyra og klöppuðu fyrir leikmönnunum í leikslok þrátt fyrir stærsta tap félagsins í 115 ár.