Brasilískur bakvörður á leiðinni til Arsenal

Arsene Wenger, stjóri Arsenal, er langt kominn með að kaupa brasilíska bakvörðinn Andre Santos frá tyrkneska félaginu Fenerbahce. Wenger ætlar að borga 6,2 milljónir punda fyrir hann samkvæmt heimildum BBC.

Santos er orðinn 28 ára gamall vinstri bakvörður en Tyrkirnir keyptu hann frá Corinthians árið 2009. Santos skoraði 5 mörk í 25 leikjum fyrir Fenerbahce þegar liðið varð tyrkneskur meistari á síðasta tímabili.

Andre Santos á að baki 22 landsleiki fyrir Braslíu og lék síðasta leik á móti Þýskalandi. Hann var með í Álfukeppninni árið 2009 en hann komst hinsvegar ekki í HM-hóp liðsins í Suður-Afríku 2010.

Wenger vantar vinstri bakvörð, Armand Traore var skelfilegur á móti United, Gael Clichy fór til Manchester City og Kieran Gibbs er meiddur. Hægri bakvörðurinn Bacary Sagna spilaði sem vinstri bakvörður í tapinu á móti Liverpool á dögunum.

Wenger verður örugglega upptekinn næstu daga því hann tilkynnti það eftir 8-2 tapið á móti Manchester United um helgina að hann ætlaði að kaupa nýja leikmenn áður en félagskiptaglugganum lokar á miðvikudagskvöldið.