Írskt glæpagengi stelur nashyrningshornum fyrir Asíubúa

Írskt glæpagengi fer nú rænandi og ruplandi um alla Evrópu. Ribbaldarnir hafa með sér verðmæt horn nashyrninga hvaðan sem þeir koma.

Þetta hefur Ritzau fréttastofan í það minnsta eftir belgísku fréttastofunni Belga. Þremur nashyrningshornum hefur verið rænt þar í landi á innan við mánuði. Hornunum er jafnan stolið úr náttúruminjasöfnum. Þau eru síðan seld fyrir þúsundir evra á svörtum markaði.

Lögreglumenn á vegum Europol telja að írskt glæpagengi beri ábyrgðina á þessum glæpaverkum. Gengið hafi einnig stolið úr dýragörðum, uppboðshúsum og úr einkasöfnum víða í Evrópu. Síðast var stolið úr Afríkusafninu í belgíska bænum Namur. Þaðan var uppstopað höfuð af hvítum nashyrningi tekið.

Sú saga fer fjöllunum hærra í Asíu að duft úr nashyrningshorni geti læknað krabbamein. Talið er að það geti hafa aukið verðmæti hornanna.