Skemmdarvörgum verður ekki sýnd nein miskunn

David Cameron, forsætisráðherra Bretlands, segir að óeirðarseggjum og skemmdarvörgum verði ekki sýnd nein miskunn, en hann telur að óeirðirnar í Lundúnum muni setja mark sitt á sögu Bretlands.

Tveir menn, sem grunaðir eru um að bera ábyrgð á dauða þriggja í óeirðunum, verða leiddir fyrir dómara síðar í dag. Cameron segir að menn hafi gefið alls kyns skýringar á því sem gerðist, en það sé einfaldlega glæpsamlegt.  Einungis fámennur hópur sé reiðubúinn til þess að brjóta af sér en um 100 þúsund fjölskyldur í Bretlandi standi afar illa fjárhagslega og félagslega. Þessar fjölskyldur kosti þjóðfélagið hundruð milljóna punda.

Cameron segir í samtali við Sunday Telegraph í dag að þessar fjölskyldur þurfi á hjálp að halda og það verði reynt að gera.