11 ára drengur hringdi í lögguna og kvartaði undan þrælkun

Aðeins 11 ára gamall drengur hringdi í neyðarlínu lögreglunnar í Þýskalandi til þess að kvarta undan því að honum væri haldið í þrælkunarvinnu á heimili sínu.

Fjallað er um málið á vefsíðu BBC en drengurinn býr í borginni Aachen. Þýska lögreglan segir að drengurinn hafi tjáð þeim að hann þyrfti að vinna á heimilinu allan daginn og hefði engan frítíma aflögu.

Samkvæmt upptöku af símtalinu sem birt hefur verið í þýskum fjölmiðlum spurði lögregla drenginn hverskonar þrælkunarvinnu væri um að ræða. Drengurinn sagðist þurfa að þrífa til á heimilinu og hreinsa verönd þess. Aðspurður um hvort hann vissi hvað þrælkunarvinna væri sagðist drengurinn vera með það á hreinu.

Þegar hér var komið sögu var móðir drengsins komin að hlið hans og tók við símanum. Hún tjáði lögreglunni að drengurinn hefði ítrekað hótað því að hringja í neyðarlínuna. Móðirin sagði að hún hefði beðið son sinn um að taka til eftir sig en hann vildi helst leika sér allan daginn. Það var þessi tiltekt sem drengurinn kallaði þrælkunarvinnu.