Ellen myndi gleðja mörg hjörtu ef hún yrði viðstödd gönguna

„Hún er ekki á okkar vegum," segir Eva María Þórarinsdóttir Lange, sem situr í stjórn Hinseigin daga sem hefjast á fimmtudaginn næstkomandi.

Grínistinn, leikkonan og þáttastjórnandinn Ellen er stödd hér á landi en það sást til hennar í búðinni Söstrene Grene Smáralind í gær. Líklegt er að Ellen verði viðstödd gleðigönguna sem fer fram á laugardaginn en gangan hefur stækkað með hverju árinu og sækja sífellt fleiri hana með hverju árinu.

Eva María segir að Ellen sé mikið átrúnaðargoð hjá lesbíum en einnig hjá hommum. „Hún er mjög stórt nafn og það eru fáir sem þekkja hana ekki. Hún hefur gert heilmikið fyrir okkur og hefur grínast mikið með sína kynhneigð, enda er hún aðallega grínisti.“ Ef Ellen verður viðstödd gönguna á laugardaginn segir Eva María að það yrði mikill heiður. „Það er ekki spurning að hún myndi gleðja mörg hjörtu.“

Undirbúningurinn fyrir gönguna gengur vel að sögn Evu Maríu. „Það er mikið að gera og allt í fullum undirbúningi svo á fimmtudagskvöldið hefst hátíð formlega. Þetta verður bara skemmtilegt,“ segir hún að lokum.