Terry: Villas-Boas er nútíma þjálfari sem heldur ekki langar ræður

John Terry, fyrirliði Chelsea, er mjög sáttur með nýja stjórann á Brúnni, Portúgalann André Villas-Boas. Villas-Boas er tíundi stjórinn sem hinn þrítugi  Terry hefur haft á ferli sínum með Chelsea en jafnframt sá langyngsti enda er Villas-Boas aðeins þremur árum eldri en Terry.

„Hann hefur komið sterkur inn og við höfum allir verið á sömu blaðsíðu frá fyrsta degi. Við allir mjög forvitnir að sjá hvað hann gerir á næstu vikum," sagði John Terry.

„Hann heldur ekki langar ræður og mun ekki tala í 20 eða 30 mínútur í einu. Hann er stuttorður en kemur öllu mjög vel til skila hvort sem það er á æfingum eða á liðsfundum," sagði Terry.

Terry er mjög ánægður með æfingarnar og hann segir það fara ekki á milli mála að Villas-Boas vilji umfram allt að Chelsea-liðið spili flottan fótbolta. Bolti er mikið notaður á öllum æfingum og Villas-Boas lætur menn ekki hlaupa úr sér lungun.

„André er nútíma þjálfari og ég er hrifinn af hans þjálfaraaðferðum. Hann skilur leikmennina og notar ekki einhverja gamaldags aðferðir," sagði Terry.