Vongóðir um að Van der Vaart nái fyrsta leik

Kevin Bond, aðstoðarstjóri Tottenham, er vongóður um að Hollendingurinn Rafael van der Vaart verði orðinn góður af meiðslum sínum áður en liðið leikur sinn fyrsta leik í ensku úrvalsdeildinni.

Tottenham mætir Everton um næstu helgi en Van der Vaart missti af æfingaleik liðsins gegn Athletic Bilbao fyrir stuttu. Hann meiddist á ökkla fyrr á undirbúningstímabilinu.

„Við erum með krosslagða fingur fyrir hann,“ sagði Bond við enska fjölmiðla.

Það gæti þó reynst raunhæfara að Van der Vaart spili ekki á ný fyrr en að Tottenham mætir Hearts í forkeppni Evrópudeildar UEFA þann 18. ágúst næstkomandi. Eggert Gunnþór Jónsson leikur með Hearts.