Diouf í fimm ára bann frá landsliðinu

El Hadji Diouf, hinn umdeildi leikmaður Blackburn Rovers, hefur verið settur í fimm ára bann frá knattspyrnu í heimalandi sínu Senegal. Diouf var afar gagnrýninn á knattspyrnusamband Senegal eftir að hann var ekki valinn í landsliðið í undankeppni Afríkukeppninnar.

„Ég get staðfest að Diouf hefur verið settur í fimm ára bann sem meinar honum að spila í öllum leikjum skipulögðum af knattspyrnusambandinu," sagði Vicvor Cisse framkvæmdastjóri sambandsins við Reuters fréttastofuna.

Diouf var afar gagnrýninn á stjórnendur í afrískri knattspyrnu í útvarpsviðtali á dögunum og sagði allt kerfið gjörspillt. Knattspyrnusamband Senegal boðaði Diouf á fund til þess að útskýra mál sitt. Diouf hótaði hins vegar öllu illu ef sambandið ákvæði að refsa honum, sem það hefur nú gert.

Diouf sem sló í gegn með Senegal á heimsmeistaramótinu í Japan og Suður-Kóreu árið 2002 hefur komið víða við síðan. Liverpool, Sunderland og Bolton hafa öll notið krafta hans og vandræðagangs. Á síðustu leiktíð var hann á láni hjá Rangers í Skotlandi en hann er samningsbundinn Blackburn Rovers.