Aron Einar: Byrjaður að vaxa mosi á mér á hótelinu

Aron Einar Gunnarsson leikmaður Cardiff tekur ekki þátt í æfingaleik Cardiff gegn Parma á Þúsaldarvellinum í Cardiff á morgun. Malky Mackay knattspyrnustjóri Cardiff vill hvíla Aron sem fékk lítið sumarfrí vegna anna með landsliðum Íslands.

„Undirúningstímabil er alltaf undirbúningstímabil. Við höfum verið að spila við slakari lið. Þetta var líka svona hjá Coventry. Úrslitin skipta ekki öllu máli. Þetta snýst um að hlaupa og koma sér í leikform. Við spiluðum reyndar leik gegn Celtic líka, stóðum okkur vel en töpuðum reyndar 1-0,“ segir Aron.

Aron Einar segist hafa verið í fínu formi þegar hann kom til félagsins enda stutt síðan hann spilaði með landsliðum Íslands. Hann verður hvíldur á morgun þegar Hernan Crespo og félagar í Parma sækja Cardiff heim.

„Hann (Mackay) vill frekar hafa mig ferskan á móti West Ham (í fyrsta leik tímabilsins). Hann vill ekki taka neina áhættu á álagsmeiðslum í upphafi tímabils. Það hafa verið margir leikir bæði með A-landsliðinu og U21 árs liðinu. Ég skil hann mjög vel. Ég fæ allavegna að sitja uppi í stúku eða á bekknum og njóta þess að horfa á fótbolta.“

Aron Einar var nýkominn upp á hótelherbergi þegar blaðamaður heyrði í honum hljóðið í dag. Aron er orðinn hundleiður á því að búa á hóteli.

„Jú, ég er reyndar að flytja út á mánudaginn. Var að hitta leigusalann og skrifa undir. Ég verð fluttur inn á mánudaginn sem betur fer. Það er byrjaður að vaxa mosi á mér hérna á hótelinu. Ég hélt að það tæki mosa 100 ár að vaxa en það er ekki svoleiðis. Maður er kominn með nóg af hótelmat og þernunum að gera allt fyrir mann. Maður getur loksins farið að elda sinn eiginn mat á mánudaginn,“ segir Aron eldhress að vanda.