Tryggvi: Vissum alveg hvað við ætluðum að gera

Maður leiksins, Tryggvi Guðmundsson, var að vonum ánægður í leikslok. Tryggvi sem er fyrrum FH-ingur skoraði eitt og lagði upp annað í 3–1 sigri Eyjamanna og FH-ingunum.

„Já, ég verð að segja að þetta hafi verið flottur leikur í alla staði hjá okkur og flottur undirbúningur. Við vissum alveg hvað við ætluðum að gera og það voru allir að leggja sig 100 prósent fram.“

 

Eyjamenn, sem eru nýkomnir frá Írlandi þar sem þeir duttu út úr Evrópudeildinni gegn St. Patrick’s, voru örlítið þreyttir fyrir leikinn og kvörtuðu yfir því að leikurinn hafi ekki verið færðu til.

„Það var þreyta í okkur, búið að vera mikið prógram uppá síðkastið og margir leikir en þetta var algjör viljasigur. Unnum vel og mikið bæði sóknalega og varnarlega og náðum að gera 3 mörk.“

Athygli vakti að Þórarinn Ingi Valdimarsson byrjaði á bekknum en það var vegna þreytu.

„Það er það sem Heimir gerði fyrir þetta tímabil að stækka hópinn og breikka. Við vissum að á þessum tímapunkti þyrftum við á því að halda þegar það er svona mikið prógram. Það er það sem er að skila okkur þessum árangri að hafa mikla samkeppni um allar stöður,“ sagði Tryggvi Guðmundsson.