Ólafur Örn: Mikilvægt fyrir sálartetrið

Ólafur Örn Bjarnason spilandi þjálfari Grindvíkinga var þokkalega sáttur að fá eitt stig gegn Fram í kvöld. Hann sagði mikilvægt að fá eitthvað út úr leiknum eftir útreiðina gegn FH.

„Eftir síðasta leik er ekkert skrítið að menn væru svolítið varkárir. Við ætluðum að yfirvinna það með því að vera grimmir og agressívir en það gekk ekki hjá okkur. Þegar Framararnir skora sést að það grípur um sig smá örvænting.

Í síðari hálfleik var meiri ákefð og baráttuhugur. Það skein út úr andlitinu á mönnum. Það var mjög mikilvægt að fá eitthvað út úr þessum leik sérstaklega eftir síðasta leik fyrir sálartetrið á mönnum,“ sagði Ólafur Örn.

Stigið kemur sér betur fyrir Grindvíkinga en Framara sem sitja einir, einmana á botninum. Ólafur Örn vill ekki meina að menn hafi verið sáttir við eitt stig fyrirfram.

„Nei, menn ræddu ekkert svoleiðis fyrir leikinn. Auðvitað liði okkur í gulu búningnum betur ef við hefðum fengið þrjú stig. Leikurinn hefði getað farið í báðar áttir. Í lokin sást að mönnum leið ekki vel með boltann, sérstaklega tilbaka. Það held ég að hafi verið smá eftirskjálfti eftir síðasta leik. Menn voru ekkert æstir í að fá boltann,“ sagði Ólafur Örn.

Ray Anthony Jónsson var ekki í leikmannahóp Grindvíkinga í kvöld.

„Hann er búinn að vera slæmur í maganum og náranum. Ég fékk þau skilaboð frá honum í gær að hann væri ekki klár í þetta,“ sagði Ólafur Örn.