Umfjöllun: Dramatískt jöfnunarmark hélt spennu í toppbaráttunni

Valsmenn enduðu tíu leikja sigurgöngu KR-inga í öllum keppnum með því að ná 1-1 jafntefli á KR-vellinum í kvöld í leik liðanna í 11. umferð Pepsi-deildar karla. Það munar því áfram aðeins einu stigi á tveimur efstu liðum deildarinnar, en KR á að vísu leik til góða.

Mörkin í leiknum létu bíða efrir sér því þau komu bæði á lokamínútum leiksins sem voru afar dramatískar.

Valsmaðurinn Halldór Kristinn Halldórsson varð fyrir því óláni að skora sjálfsmark eftir hornspyrnu Bjarna Guðjónssonar á 86. mínútu og kom KR þá í 1-0 en hann bætti fyrir það með því að leggja upp jöfnunarmark Pól Jóhannus Justinussen þremur mínútum síðar.

KR-ingar hefði náð fjögurra stiga forskoti á Val á toppnum með sigri en nú munar áfram aðeins einu stigi á liðunum.

KR hafði unnið tíu leiki í röð í öllum keppnum fyrir leikinn í kvöld þar af fjóra þeirra í Pepsi-deildinni.

Fyrri hálfleikur var nokkuð kaflaskiptur en knattspyrnan sem var spiluð var ekkert sérstaklega góð. Það skánaði aðeins í seinni hálfleik. Þá byrjuðu Valsmenn betur en KR-ingar tóku völdin á vellinum eftir því sem leið á leikinn.

Valsmenn voru mjög fastir fyrir í sínum varnarleik en að sama skapi var lítið bit í sóknarleik liðsins. Þeir voru hættulegastir í skyndisóknum og í einni slíkri, rúmum 20 mínútum fyrir leikslok, vildu Valsmenn fá víti. Grétar Sigfinnur Sigurðarson braut á varamanningum Matthíasi Guðmundssyni en ekkert var dæmt. Valsmenn voru afar ósáttir.

Stuttu síðar átti bakvörðurinn Magnús Már Lúðvíksson skalla í slá og var nálægt því að stela senunni. En pressa KR-inga bar árangur en það þurfti Valsmann til að koma boltanum yfir línuna. Halldór Kristinn Halldórsson varð fyrir því óláni er hann stýrði boltanum í eigið net eftir hornspyrnu Bjarna Guðjónssonar.

Valsmenn gáfust þó ekki upp og Halldór Kristinn náði að bæta fyrir fyrri mistökin með því að leggja upp jöfnunarmarkið. Hann skallaði sendingu fyrrum KR-ingsins Ingólfs Sigurðssonar úr aukaspyrnu að marki KR og Pól Justinussen fylgdi á eftir og skoraði.

KR-ingar hafa nú leikið sextán leiki í röð án taps í öllum keppnum en Valsmenn eru ósigraðir í síðustu sjö deildarleikjum sínum. Þessi tvö lið hafa nú tekið nokkuð afgerandi forystu í deildinni en úrslitin í þessum leik þýða að Valsmenn gefa ekkert eftir í toppbaráttunni. Tímabilið er nú hálfnað og aldrei að vita nema að titillinn verður undir þegar þess lið mætast aftur í lokaumferð deildarinnar, seint í haust.

KR – Valur 1-1

Dómari: Magnús Þórisson (5)

Skot (á mark): 12–12 (2-3)

Varin skot: Hannes 2 – Haraldur 2

Hornspyrnur: 6–4

Aukaspyrnur fengnar: 12–13

Rangstöður: 6–0