Umfjöllun: Ingi Freyr hetja Þórsara

Ingi Freyr Hilmarsson tryggði Þórsurum farseðilinn í undanúrslit Valitor-bikarkeppninnar, í þriðja skipti í sögu félagsins, með marki í blálok framlengingar í jöfnum leik við Grindavík.

Jafnræði var með liðunum í venjulegum leiktíma og ef eitthvað var voru Grindvíkingar sterkari en Þórsarar voru hins vegar töluvert sterkari í framlengingunni.

Fyrri hálfleikur var ekki sérstaklega vel spilaður af hálfu beggja liða, bæði reyndu þau langar sendingar yfir varnir andstæðinga sinna án árangurs enda sterkir skallamenn í hjarta beggja varna.

Þórsarar skoruðu úr einu hornspyrnu sinni í fyrri hálfleik, var þar að verki David Disztl með skalla á fjærstöng. Grindvíkingar jöfnuðu hins vegar leikinn með marki Magnúsar Björgvinssonar á síðustu andartökum fyrri hálfleiks. Magnús lagði boltann í netið af stuttu færi eftir fyrirgjöf Ray Antony Jónssonar.

Magnús hefði þó svo sannarlega átt að vera skora sitt annað mark í fyrri hálfleik því hann klúðraði einnig sannkölluðu dauðafæri er hann stóð einn og óvaldaður á fjærstöng en tókst einhvernvegin að skalla boltann yfir.

Markaskorari Þórsara, David Disztl hefði einnig átt að setja annað mark er hann lyfti boltanum yfir Óskar Pétursson markvörð Grindavíkur sem kominn var í skógarferð úr markinu en vippa Davids fór rétt framhjá markinu.

Seinni hálfleikur var um margt keimlíkur þeim fyrri, utan þess að liðin reyndu bæði að spila boltanum með jörðu og skánuðu gæði leiksins mikið við það.

Gestirnir voru meira með boltann en nýttu sér það ekki nógu vel. Þeir fengu samt sem áður tvo mjög góð færi til að klára leikinn en þeir Magnús Björgvinsson og Yacine Salem fóru illa með þau.

Hinu megin vallarins var ekki jafn mikið um dauðafæri en Þórsarar áttu mjög líklega að fá vítaspyrnu þegar Atli Sigurjónsson var felldur innan teigs en Magnús Þórisson annars ágætur dómari leiksins dæmdi ekkert.

Staðan eftir venjulegan leiktíma var 1-1 og því var leikurinn framlengdur.

Í framlengingunni voru heimamenn töluvert sterkari aðilinn og virkuðu einfaldlega í betra formi en Grindvíkingar.

Það var þó ekki mikið um færi í framlengingunni, bæði lið reyndu töluvert af langskotum en fæst þeirra hittu á markið.

Í lok framlengingarinnar dróg hins vegar heldur betur til tíðinda, Gunnar Már Guðmundsson átti þá sendingu fyrir markið þar sem Ingi Freyr Hilmarsson var mættur á fjærstöng og náði til boltans rétt á undan Giddens markverði Grindvíkinga og vippaði laglega yfir hann og í markið.

Þórsarar ærðust af fögnuðu enda var leikurinn nánast búinn þegar markið kom.

Þeir eiga nú möguleika á að koma liði sínu í úrslitaleik Valitor-bikarkeppninnar í fyrsta skipti í sögu félagsins.