Valencia nálægt því að brjóta ökklann aftur

Antonio Valencia leikmaður enska úrvalsdeildarliðsins Manchester United komst nálægt því að endurtaka meiðslin sem ullu því að hann var frá stóran hluta síðasta tímabils. Valencia meiddist á ökkla í markalausu jafntefli Ekvador gegn Paragvæ.

„Andstæðingur hans steig á fótinn á honum og var nálægt því að brjóta hann aftur," sagði Tony Ocampo læknir landsliðs Ekvador.

Valencia var skipt af velli í hálfleik og ljóst er að hann missir af leiknum gegn Venesúela á laugardag. Valencia braut á sér ökklann í leik gegn Rangers í Meistaradeildinni á síðustu leiktíð og var frá í hálft ár.

„Hann er marinn á staðnum þar sem títaníum platan er staðsett. Hann gat ekki sett neitt álag á löppina en nú hefur bólgan minnkað um 40 prósent síðan á sunnudag. Hann missir af leiknum á laugardaginn en verður leikfær gegn Brasilíu," bætti Ocampo við.