Arnar Sveinn: Skrítið að sigurinn hafi ekki orðið stærri

Arnar Sveinn Geirsson leikmaður Vals sagði allt hafa gengið upp hjá sínum mönnum í 2-0 sigrinum á Keflavík. Arnar átti frábæran leik á hægri kantinum hjá Valsmönnum.

„Já, mér leið vel og öllu liðinu. Við vorum búnir að undirbúa okkur vel fyrir leikinn.“

Það var aldrei annað að sjá en að Valsmenn myndu fara með sigur af hólmi í leiknum í kvöld.

„Við unnum allir heimavinnuna vel. Við fengum góð skilaboð frá þjálfaranum og það gekk fullkomlega upp það sem lagt var upp með. við áttum sigurinn svo sannarlega skilinn og eiginlega skrítið að hann hafi ekki verið stærri.“

Valsmenn áttu frekar slæman dag gegn Víkingum í síðustu umferð en sýndu þó karakter með því að koma tilbaka. Hann segir öll lið eiga slæma leiki inn á milli.

„Við vitum hvað við getum í fótbolta. Maður getur alltaf átt lélegan leik, ég tala ekki um þegra við erum einum færri og þurfum að vinna mun meira en vanalega. En maður getur alltaf átt slæman leik og það var kannski slæmur leikur síðast. Það þýðir samt ekkert að við séum orðnir verri í fótbolta. við komum bara í næsta leik og sýnum hvað við getum.“

Valur er tveimur stigum á eftir KR í öðru sæti deildarinnar. Hann neitar þó að gefa það út að liðið stefni á titilinn.

„Allir þessir leikir eru mjög krefjandi. Öll liðin í deildinni eru að týna stig hvert af öðru. Næsti leikur er gegn Þór og svo er stutt í leikinn gegn KR. Auðvitað er gaman að nálgast toppinn en markmiðið er einn leikur í einu og klára næsta verkefni,“ sagði Arnar Sveinn.

Það var þokkalega mætt af Valsmönnum í Keflavík í kvöld og Arnar Sveinn var ánægður með stuðningsmennina.

„Það er virkilega gaman. Ég er rosalega ánægður að sjá þetta. Það hefur vantað mikið uppá. Þetta hjálpar okkur rosalega mikið. Við þurfum á þessu að halda og ég er virkilega ánægður með þetta,“ sagði Arnar Sveinn að lokum.