Umfjöllun: ÍBV vann á umdeildu víti

Andri Ólafsson reyndist hetja sinna manna í ÍBV gegn Stjörnunni í kvöld þrátt fyrir að hafa spilað í aðeins tíu mínútur. Hann skoraði sigurmark ÍBV úr vítaspyrnu sem hann fiskaði sjálfur. Lokatölur 2-1 fyrir ÍBV.

Jafnræði var með liðunum í fyrstu en Eyjamenn tóku völdin á vellinum snemma í síðari hálfleik og uppskáru verðskuldaða forystu með marki Ian Jeffs. ÍBV skoraði þar að auki tvö mörk til viðbótar í fyrri hálfleik sem fengu ekki að standa. Það fyrra vegna brots og svo rangstöðu.

Stjörnumenn náðu þó að koma sér betur inn í leikinn áður en flautað var til hálfleiks og þeir áttu svo eftir að taka völdin í leiknum í þeim síðari.

Greinilegt var að Eyjamenn voru orðnir þreyttir á öllum hlaupunum sem skiluðu svo góðum árangri í fyrri hálfleik. ÍBV spilaði bikarleik fyrir aðeins þremur dögum síðan og tefldi Heimir Hallgrímsson fram sömu ellefu mönnunum í byrjunarliði sínu í kvöld.

Stjörnumenn gengu á lagið og byrjuðu á því að fá vítaspyrnu á 66. mínútu. Halldór Orri Björnsson var þar að verki og tók hann spyrnuna sjálfur. Abel Dhaira varði hins vegar mjög vel frá honum og virtist ætla að fara langt með að tryggja sínum mönnum öll stigin þrjú í kvöld.

En átta mínútum síðar gerði hann sig sekan um slæm mistök. Garðar Jóhannsson átti fremur saklaust skot að marki eftir skyndisókn en Dhaira missti boltann inn fyrir marklínuna. Stjörnumenn jöfnuðu metin og ætluðu sér að sækja sigurinn.

Það gekk mikið á síðustu mínúturnar og Erlendur Eríksson, dómari leiksins, hafði í miklu að snúast. Mikið var um pirringsbrot og bæði leikmenn og áhorfendur kvörtuðu gríðarlega mikið undan dómgæslunni.

Ekki minnkaði það þegar að ÍBV fékk skyndilega vítaspyrnu á 86. mínútu. Andri var þá að elta boltann út úr teignum þegar Tryggvi Bjarnason virtist brjóta á honum og var vítið dæmt. Stjörnumenn voru alls ekki ánægðir og fannst vítið ansi ódýrt.

Andri steig sjálfur á vítapunktinn og skoraði örugglega. Hann gat spilað í aðeins tíu mínútur í kvöld vegna meiðsla sem enn eru að plaga hann en gerði nóg til að tryggja sínum mönnum þrjú dýrmæt stig í toppbaráttu Pepsi-deildarinnar.

ÍBV - Stjarnan 2-1

Dómari: Erlendur Eiríksson (6)

Skot (á mark): 7–7 (3-5)

Varin skot: Dhaira 4 – Ingvar 1

Hornspyrnur: 5–3

Aukaspyrnur fengnar: 16–13

Rangstöður: 8–1