Umfjöllun: Fylkismenn nýttu ekki færin

Fylkir tapaði dýrmætum stigum í dag ef liðið ætlar að halda sér í toppbaráttu Pepsi-deildar karla. Árbæingar máttu sætta sig við 1-1 jafntefli eftir að hafa farið illa með fjölmörg góð færi í leiknum.

Bæði mörk leiksins komu snemma. Sveinn Elías Jónsson skoraði á áttundu mínútu eftir lélega hreinsun úr vörn Fylkismanna en varnarleikur heimamanna hefur oft verið meira sannfærandi en í kvöld.

Fylkismenn voru þó ekki nema þrjár mínútur að svara fyrir sig. Andrés Már Jóhannsson sýndi klókindi þegar hann lagði boltann fyrir fætur Alberts Brynjars Ingasonar í teig Þórsara og skoraði sá síðarnefndi með öruggu skoti.

Fylkismenn voru mun líklegri til að skora eftir þetta en þeim virtist fyrirmunað að koma boltanum aftur í netið. Andrés Már var sérlega líflegur eins og svo oft áður í sóknarleik Fylkismanna en það virðist fara honum betur að leggja upp mörkin en skora þau. Hann hefur ekki enn skorað á tímabilinu.

Hann komst næst því að skora þegar hann átti skot í slá á 22. mínútu úr þröngu færi. Hann átti einnig 2-3 hættuleg skot að marki þar að auki ásamt því að hann lagði upp nokkur góð færi fyrir félaga sína.

En langbesta færi leiksins fékk Baldur Bett. Fylkismenn komust í skyndisókn og var Baldur á undan markverðinum Rajkovic í boltann en sá síðarnefndi var kominn í ægilegt skógarhlaup - langt út fyrir eigin vítateig. Baldur þurfti lítið annað að gera en að skora en ákvað engu að síður að renna honum á Andrés Má.

Hann virtist hins vegar hafa gleymt rangstöðureglunni. Vissulega var varnarmaður á milli Andrésar og marks Þórsara en þar sem Rajkovic var enn langt í burtu var varnarmaðurinn aftasti maður Þórsara og var því ekki að spila Andrés Má réttstæðan. Þetta sá Gylfi Már Sigurðsson, aðstoðardómari, og lyfti hann réttilega flaggi sínu.

Þórsarar fengu sín færi sem geta þó varla talist mikið meira en hálffæri. Þeir náðu þó að halda sjó í fjörlegum fyrri hálfleik og þeir áttu eftir að gera enn betur í þeim síðari.

Síðari hálfleikur var nefnilega afar tilþrifalítill. Fylkismenn voru áfram duglegir að halda boltanum en nú náðu Þórsarar að stöðva sóknaraðgerðir þeirra fyrr og með betri árangri. Fyrir utan fáein skot utan af velli sem Rajkovic varði var marki Þórsara lítið sem ekkert ógnað.

Gunnar Már Guðmundsson var meira að segja nálægt því að stela sigrinum fyrir Þórsara í uppbótartíma en skot hans hæfði ekki mark heimamanna. Því fór sem fór og Þórsarar gengu sáttir af velli enda ekki tapað nú í fjórum leikjum í röð í deild og bikar. Fylkismenn geta nagað sig í handarbökin og munu sjálfsagt gera það fram að næsta leik.

Fylkir - Þór 1-1

Dómari: Gunnar Jarl Jónsson (7)

Skot (á mark): 19–9 (8-2)

Varin skot: Fjalar 1 – Rajkovic 6

Hornspyrnur: 9–3

Aukaspyrnur fengnar: 13–9

Rangstöður: 4–2