Umfjöllun: Enn einn sigurinn hjá KR

KR-ingar halda áfram sigurgöngu sinni í Pepsi-deild karla. Í kvöld styrktu þeir stöðu sína á toppnum með sanngjörnum 3-0 sigri á Grindvíkingum Suður með sjó. KR-ingar eru því með 20 stig í efsta sæti á meðan Grindvíkingar eru í tíunda sæti með sjö stig.

Rúnar Kristinsson þjálfari KR-ingar gerði djarfar breytingar á sínu liði. Viktor Bjarki Arnarsson og Kjartan Henry Finnbogason sem hafa verið lykilmenn í liði þeirra svarthvítu til þess tóku sér báðir sæti á bekknum. Í þeirra stað spiluðu Ásgeir Örn Ólafsson og Guðjón Baldvinsson.

Það var ekki að sjá í fyrri hálfleik að liðin væru að berjast á báðum endum deildarinnar. Fyrri hálfleikur var afspyrnuslakur og sóknarleikur beggja liða var afar máttlaus. Gestirnir voru þó ívið sterkari en sköpuðu sér þó ekki nein teljandi færi. Rúnar þjálfari KR-inga hefur eflaust lesið hressilega yfir hausamótunum á sínum mönnum á leikhlénu því allt annað var að sjá til KR þegar flautað var til seinni hálfleiks. KR-ingar byrjuðu seinni hálfleikinn af fítonskrafti og voru búnir að skora tvö mörk á fyrstu tíu mínútunum.

Ásgeir Örn Ólafsson skoraði fyrsta mark leiksins með skoti úr vítateig eftir sendingu Guðjóns Baldvinssonar. Vel afgreitt hjá Ásgeiri sem hingað til hefur ekki verið þekktur fyrir hæfni sína fyrir framan mark andstæðinganna. Skömmu síðar dúkkaði upp annar ólíklegur markaskorari. Guðmundur Reynir Gunnarsson skallaði þá boltann inn af stuttu færi eftir góðan undirbúning Gunnars Arnars Jónssonar.

Staðan orðin 0-2 í upphafi seinni hálfleiks og við þessa syrpu KR-inga var sem þeir tækju öll völd á vellinum. Það sem eftir lifði leiks stjórnuðu þeir því sem gerðist á vellinum. Þriðja og síðasta mark leiksins kom svo á 86 mínútu þegar Kjartan Henry Finnbogason batt endahnútinn á vel útfærða skyndisókn. Gunnar Örn Jónsson átti þá glæsilega sendingu frá kantinum þar sem Kjartan lúrði á fjærstönginni og kláraði færið vel. Lokatölur 0-3. Sanngjarn KR-sigur.

KR-ingar geta vel við unað. Þeir byrjuðu leikinn rólega en skiptu svo um gír þegar þess þurfti. Það ætti að vera ánægjuefni fyrir KR-inga að geta geymt lykilmenn á bekknum og að það sjáist varla á liðinu. Vesturbæingar voru þó slakir í fyrri hálfleik en vöknuðu svo um munaði í þeim síðari. Grindvíkingar hinsvegar voru nánast aldrei með og má segja að þeir hafi lullað í gegnum leikinn í hlutlausum gír. Einhvern kraft vantaði í liðið og þá sérstaklega fram á við.

Grindavík - KR 0-3

Dómari: Guðmundur Ársæll Guðmundsson (8)

Skot (á mark): 8-15 (3-7)

Varin skot: Hannes 3 - Óskar 4

Hornspyrnur: 4-4

Aukaspyrnur fengnar: 9-15

Rangstöður: 3-3