Ólafur: Skömm að vinna ekki leikinn

Ólafur Þórðarson, þjálfari Fylkis, segir að það hafi verið grátlegt hjá sínum mönnum að hafa gefið frá sér tvö stig gegn Þór í dag. Liðin skildu jöfn, 1-1, en Fylkismenn fengu nóg af færum til að tryggja sér sigurinn.

„Ég sagði svo sem ekkert sérstakt við þá í dag, við förum betur yfir þetta á morgun. En ég er mjög ósáttur við hvernig við fórum með færin hérna í dag. Það er bara grátlegt að við skyldum hafa gefið frá okkur tvö stig í þessari baráttu,“ sagði Ólafur en viðtalið má sjá í heild sinni hér fyrir ofan.

„Við sköpuðum okkur fullt af færum og skömm fyrir okkur að hafa ekki unnið þennan leik. Kannski var einbetingarskortur, klaufaskapur eða óheppni sem varð til þess að við nýttum ekki færin okkar.“

Hann segir að það hafi engu breytt þó svo að Fylkir hafi ekki spilað síðan í byrjun júní.

„Nei, við erum búnir að æfa vel og erum í fínu standi. Framhaldið kemur svo bara í ljós, það er ekkert flókið.“