Gunnar Már: Gæti reynst mikilvægt stig

Gunnar Már Guðmundsson, leikmaður Þórs, segir að sínum mönnum hafi tekist það sem þeir ætluðu sér fyrir leikinn gegn Fylki - að ná í að minnsta kosti eitt stig úr leiknum. Honum lauk með 1-1 jafntefli.

„Mér voru mislagðir fætur og hitti ég ekki boltann,“ sagði Gunnar Már spurður um færið sem hann fékk í blálok leiksins. Hann hefði þar getað tryggt sínum mönnum sigur í leiknum.

„En við erum sáttir við þetta stig. Við erum sáttir við það og það gæti reynst mikilvægt að lokum,“ bætti Gunnar við en viðtalið má sjá í heild sinni hér fyrir ofan.

„Það er stígandi í liðinu og ef við höldum áfram með þá baráttu sem við sýndum í dag getum við valdið hvaða liðið sem er erfiðleikum.“

„Eins og er virðist það einkenna okkur að falla til baka ef við erum með stig í húsi. Við þurfum kannski að halda boltanum betur. Við eigum Val næst í deildinni og við munum vinna þann leik.“