Ingimundur: Sköpuðum okkur milljón færi

Fylkismaðurinn Ingimundur Níels Óskarsson var skiljanlega ósáttur við að hafa gert 1-1 jafntefli við Þór í dag enda hafi Fylkir verið hættulegri aðilinn í leiknum.

„Við erum virkilega fúlir með þessa niðurstöðu enda ætluðum við okkur að taka þrjú stig hérna í dag,“ sagði Ingimundur Níels en viðtalið má sjá í heild sinni hér fyrir ofan.

„Við vorum sofandi í byrjun leiksins en náðum að rífa okkur og skapa okkur að ég held milljón færi. En boltinn vildi ekki inn.“

„Svo í seinni hálfleik náðum við ekki að skapa okkur neitt og þeir lágu í skotgröfunum. Svo rennur þetta út í sandinn og við vorum kannski bara heppnir á endanum að þeir skyldu ekki ná að stela sigrinum.“

Hann segir að Þórsarar hafi náð að verjast betur sóknarleik Fylkismanna í síðari hálfleik.

„Við fórum í gegnum þá hægra megin hvað eftir annað í fyrri hálfleik. Kannski áttuðu þeir sig á því og náðu að stoppa í það gat. En ég hef engar áhyggjur af okkur. Við sköpuðum okkur fullt af færum og ef okkur tekst að nýta þau þá erum við í góðum gír.“