Sigrún Pálína vill að Karl víki sem biskup

10. júní 2011 18:52

Sigrún Pálína Ingvarsdóttir, fórnarlamb Ólafs Skúlasonar, lítur ekki á niðurstöður skýrslu rannsóknarnefndar kirkjuþings sem gleðitíðindi. Hún segist hafa beðið eftir þessari niðurstöðu í yfir þrjátíu ár og sorglegt sé að núverandi biskup skuli ekki taka ábyrgð á gjörðum sínum.

Sigrún Pálína er ein þeirra kvenna sem sakaði Ólaf Skúlason Biskup um kynferðisbrot og er nokkuð áberandi í skýrslunni. Eitt af þeim atriðum sem rannsóknarnefndin kannaði sérstklega voru sáttafundir sem séra Karl Sigurbjörnsson og Hjálmar Jónsson áttu með Sigrúnu Pálínu og Dagbjörtu Guðmundsdóttur í Hallgrímskirkju 2. og 3. mars árið 1996. Atvikum er lýst á 25 síðum og þar gætir verulegs ósamræmis á milli aðila, meðal annars um tímasetningu funda, gerð yfirlýsingar og ummæla sem Karl og Hjálmar létu falla að fundi loknum.

"Það er ljóst að endapunkturinn þar er að þar stendur orð á móti orði og nefndinn telur sig ekki hafa forsendur til að skera úr um það atriði," segir Róbert Spanó, formaður Rannsóknarnefndar Kirkjuþings.

Sigrún Pálína segist hinsvegar enn halda fast í það sem rétt sé í þessu máli, hún viti hvað gerðist og að sínu viti eigi séra Karl að víkja sem biskup. "Mér finnst bara sorglegt að þessi staða skuli vera svona í dag og sorglegt að hann skuli ekki taka ábyrgð."

Hún segist ekki vera búin að gera upp við sig hvernig taka eigi á niðurstöðum nefndarinnar, það sé kirkjuráðs að ákveða með framhaldið. "Ég upplifði þetta ekki sem neinn gleðidag því ég vildi óska þess að ekkert af þessu hefði gerst."

Sigrún Pálína segist því ekki upplifa neina sigurgleði og sé þess í stað sorgmædd.

Tengdar fréttir

Karl gerði mistök í máli Guðrúnar Ebbu

Rannsóknarnefnd Kirkjuþings kemst meðal annars að þeirri niðurstöðu að Karl Sigurbjörnsson biskup hafi orðið á mistök sem forseti kirkjuráðs varðandi úrlausn mála Guðrúnar Ebbu Ólafsdóttur varðandi erindi sem hún sendi í mars 2009 vegna meintra kynferðisbrota föður síns, Ólafs Skúlasonar.

10. júní 2011 11:17

Ólafur með ráðandi persónuleika - dró kirkjunnar menn í dilka

Persónuleiki Ólafs Skúlasonar, þáverandi biskups, hafði mikil áhrif á viðbrögð kirkjunnar manna þegar Ólafur var sakaður um kynferðisbrot árið 1996. Þetta kemur fram í skýrslu rannsóknarnefndar kirkjuþings sem birt var í morgun. "Þá verður ráðið af framburði þeirra sem fyrir nefndina komu að áhrif Ólafs Skúlasonar á samstarfsmenn sína og aðra starfsmenn kirkjunnar voru verulega mikil. Biskupinn hafi verið með mikinn og ráðandi persónuleika, hann hafi farið sínu fram og óhikað látið í ljósi afstöðu sína um stöðu málsins. Menn hafi verið dregnir í dilka sem annaðhvort "með honum eða á móti". Hafi hann þannig með framgöngu sinni haft mótandi áhrif á aðgerðir einstaklinga sem að málinu komu, hvort sem er á vettvangi kirkjuráðs, Prófastafélags Íslands eða stjórnar Prestafélags Íslands," segir í skýrslunni.

10. júní 2011 12:02

Séra Karl Sigurbjörnsson tjáir sig ekki

Biskup Íslands, séra Karl Sigurbjörnsson, ætlar ekki að tjá sig um skýrslu rannsóknarnefndar kirkjuþings fyrr en eftir fjóra daga. Fréttastofa óskaði eftir viðtali við Karl í ljósi þess að í skýrslunni kemur fram að hann hafi brugðist á margan hátt og gert mistök þegar biskupsmálið svokallaða kom upp árið 1996 þegar séra Ólafur Skúlason, þáverandi biskup, var sakaður um kynferðisbrot. Þá kemst nefndin að þeirri niðurstöðu að viðbrögð presta og annarra starfsmanna kirkjunnar þegar málið kom upp hafi einkennst af ráðaleysi og skorti á faglegum og vönduðum vinnubrögðum. Kirkjuþing verður haldið á þriðjudag og munu kirkjunnar menn ekki tjá sig um skýrsluna fyrr en þá. Uppgefin rök eru þau að skýrslan hafi fyrst verið birt í morgun og að menn þurfi tíma til að fara yfir hana.

10. júní 2011 12:15

Mest lesið

Fleiri fréttir