Tíu þúsund Sýrlendingar flúnir til Tyrklands

Um tíu þúsund Sýrlendingar dvelja nú í flóttamannabúðum í Tyrklandi en fólkið er að flýja óróleikan í heimalandinu þar sem öryggissveitir hafa myrt hundruð mótmælenda undanfarnar vikur.

Talsmaður Flóttamannahjálpar Sameinuðu þjóðanna segir flóttmannastrauminn aukast eftir því sem átökin stigmagnast í Sýrlandi. Hann hælir tyrkneskum yfirvöldum fyrir skjót viðbrögð og fyrir að standa vel að mótttöku flóttafólksins.

Fjölmiðlar hafa kvartað undan því að vera haldið frá flóttafólkinu en talsmaðurinn segir margt af fólkinu hrætt við að láta andlit sitt og nafn birtast í fjölmiðlum, af ótta við að öryggissveitir í Sýrlandi hefni sín á ættingjum þeirra.