Refsað fyrir að þegja um kynmök í skólarútu

Móðir í Ohio í Bandaríkjunum er ósátt við að 14 ára dóttur hennar skuli refsað fyrir að tilkynna ekki strax um að hún hefði séð tvö skólasystkini sín  eiga kynmök í skólarútunni. Saundra Roundtree sagði Associated Press fréttastofunni að dóttir hennar hefði verið í skólaferðalagi. Hún hafi skipt um sæti við strák sem vildi sitja hjá sessunauti hennar. Síðar hafi hún séð þau tvö hafa kynmök en ekki þorað að segja neitt.



Hún sagði hinsvegar móður sinni frá þessu þegar heim kom og Saundra hafði samband við skólayfirvöld. Hinum lostafullu nemendum var vísað úr skólanum og Saundra gerir ekki athugasemd við það. Hún er hinsvegar ósátt við að dóttur hennar skuli refsað með því að fá hvorki að taka þátt í lautarferð né lokaballi skólans fyrir að tilkynna ekki strax um hina forboðnu ást.