Víkingur vill fresta en Valur stefnir á að spila

Víkingur hefur óskað eftir því að leik liðsins gegn Þór á morgun verði frestað. Valsmenn stefna aftur á móti ótrauðir að því að spila gegn FH á heimavelli sínum.

Víkingsvöllurinn var í lélegu standi fyrir snjókomuna og verður vart leikhæfur á morgun. Hann er ekki upphitaður eins og Vodafonevöllur Valsmanna.

Samkvæmt heimildum Vísis kemur vel til greina að spila leik Víkings og Þórs í júní þegar hlé verður gert á deildinni vegna þáttöku U-21 árs liðsins á EM. Hvorki Víkingur né Þór á leikmenn í liðinu og því eru hæg heimatökin að spila leikinn þá.

Friðjón Friðjónsson, formaður knattspyrnudeildar Vals, sagði að ef spár stæðust og snjórinn færi yrði ekkert mál að leika á Vodafonevellinum á morgun.

Hvorugur vallanna verður mokaður í dag þar sem það skemmir vellina of mikið.