Terry: Þrái ekkert heitar en að verða aftur meistari

John Terry, fyrirliði Chelsea, mætir með lið sitt á Old Trafford á sunnudaginn og þar geta Chelsea-menn tekið toppsætið af heimamönnum í Manchester United með sigri. Það væri magnað afrek ekki síst þar sem Chelsea var fimmtán stigum á eftir United í mars.

„Öll lið lenda í slæmum kafla á hverju tímabili og þetta er bara spurning um hversu fljót þau eru að vinna sig út úr þessum slæmu köflum," sagði John Terry í viðtali við The Express.

„Við komust fljótt á skrið eftir þenann slæma kafla í fyrra en það tók okkur talsvert lengri tíma í ár. Við erum samt engu að síður komnir aftur inn í toppslaginn," sagði Terry.

„Við sýndum það að við getum unnið þá á Old Trafford í stórum leik þegar við fórum þangað í fyrra og unnum algjöran úrslitaleik á móti þeim. Það er engin ástæða til efast um að við getum ekki gert það aftur núna," sagði Terry og bætti við:

„Það er ekkert sem ég þrái heitar en að verða aftur meistari og fá aftur að lyfta bikarnum," sagði Terry sem hefur þegar lyft Englandsbikarnum þrisvar sinnum á ferlinum, 2005, 2006 og 2010.