Lukaku fer líklega til Englands

Herman van Holsbeeck, framkvæmdarstjóri belgíska félagsins Anderlecht, telur líklegt að hinn bráðefnilegi Romelu Lukaku muni næst spila í ensku úrvalsdeildinni.

Lukaku er aðeins sautján ára gamall en þykir einn allra efnilegasti leikmaður Evrópu. Hann hefur verið orðaður við lið á Spáni, Ítalíu og Þýskalandi en ensk félög hafa einnig haft auga á honum.

Van Holsbeeck hefur greint frá því að enskt félag lagði fram tilboð í Lukako í janúar síðastliðnum.

„Lið eins og Chelsea, Tottenham og Liverpool hafa áhuga,“ sagði hann við hollenska fjölmiðla. „Ef að liðin tvö frá Manchester blanda sér einnig í þessa baráttu gæti hún orðið athyglisverð.“

„Við vitum af áhuga Real Madrid á honum en mér finnst líklegt að hann muni frekar fara til Englands. Kaupverðið verður líklega um 30 milljónir evra.“

Sjálfur er Lukaku sagður vera mikill stuðningsmaður Chelsea.