Stuart Holden frá í sex mánuði eftir tæklingu Jonny Evans

Bolton-maðurinn Stuart Holden verður frá keppni næstu sex mánuðina eftir að hafa meiðst illa á hné í leiknum á móti Manchester United á laugardaginn. Holden meiddist eftir ruddatæklingu frá Jonny Evans en Evans fékk að líta rauða spjaldið fyrir brotið.

Það má sjá brotið með því að smella á svipmyndir úr leiknum hér fyrir ofan en tæklingin kemur þegar 1 mínúta og 18 sekúndur eru liðnar af myndbandinu.

Það þurfti að sauma 26 sport í hnéð á Holden en hann er nú á leiðinni til London þar sem hann þarf að fara í aðgerð á hné. Fyrir ári síðan þá fótbrotnaði Holden í landsleik með Bandaríkjunum á móti Hollandi en þá lenti hann í slæmri tæklingu á móti Nigel de Jong.

Holden staðfesti meiðsli sín á twitter-síðu sinni en sagðist ætla að koma sterkari til baka. Hann er 25 ára miðjumaður sem hefur spilað stórt hlutverk með Bolton á tímabilinu. Liðið mun sakna hans ekki síst í undanúrslitaleik bikarsins á móti Stoke.

„Stuart er búinn að vera frábær á þessu tímabili og hefur sýnt að hann er einn af bestu miðjumönnunum í deildinni," sagði Owen Coyle, stjóri Bolton um leikmanninn.