Torres: Ríkti ringulreið í Liverpool

Fernando Torres segir að það hafi ríkt ringulreið hjá Liverpool þegar félagið skipti um eigendur í október síðastliðnum. Það hafi breytt öllu.

Mikið var fjallað um söluna á sínum tíma þegar að bandaríska eignarhaldsfélagið New England Sports Ventures keypti félagið eftir hatramma baráttu við fyrrum eigendur, Tom Hicks og George Gillett, sem vildu ekki selja félagið nema fyrir uppsett verð.

Þeir Hicks og Gillett voru hins vegar búnir að skipa Martin Broughton sem stjórnarformann félagsins sem átti að sjá um sölu félagsins í samstarfi við helstu lánadrottna. Broughton tókst að keyra söluna í gegn en litlu mátti muna þar sem félagið var aðeins örfáum dögum frá því að lenda í greiðslustöðvun. Málið fór fyrir dómstóla bæði í Bretlandi og í Bandaríkjunum en á endanum var fullgengið frá sölunni til NESV, sem heitir í dag Fenway Sports Group.

Allt þetta tók sinn toll hjá Torres. Hann vissi að félagið myndi þurfa tíma til að byggja upp nýtt lið en hann vildi frekar spila með liði sem hefði getu til að berjast um alla titla.

„Ég vissi vel að ég var átrúnaðargoð hjá stuðningsmönnunum en þetta var bara ekki eins lengur," sagði Torres við spænska fjölmiðla í dag.

„Það ríkti algjör ringulreið hjá félaginu vegna sölunnar. Þetta minnti mig á mitt gamla félag, Atletico Madrid. Það er félag með frábæra sögu en þurfti bæði pening og tíma til að byggja upp nýtt lið. Ég hafði ekki þann tíma."

„Fólk í heimi knattspyrnunnar er ekki heiðarlegt. Maður getur aldrei sagt öllum allan sannleikann því þetta er harður heimur sem er stýrt af viðskiptalögmálum. Þar eru engir vinir."

Hann segir að sér líði betur hjá Chelsea en hjá Liverpool. „Félagið hefur sýnt að það er með hágæða leikmenn í hverri stöðu og getur verið með samkeppnishæft lið í hvaða keppni sem er. Liðið er líka með eiganda sem getur lagt pening í félagið þegar þess gerist þörf."

„Samskipti leikmanna eru líka persónulegri en þau voru á milli leikmanna hjá Liverpool. Það var allt svo alvarlegt þar. Hér er stemningin létt og góð og strákarnir eru duglegir að skiptast á skotum. Það þarf heldur enginn að sanna neitt fyrir öðrum, það er bara gert ráð fyrir því að þú hagir þér á fagmannlegan máta."