Neville segir að hinn 69 ára gamli Ferguson eigi mörg ár eftir

Gary Neville, sem nýverið hætti að leika með Manchester United, segir að Sir Alex Ferguson knattspyrnustjóri liðsins eigi nokkur ár eftir í starfi sínu þrátt fyrir að Ferguson sé 69 ára gamall. Jose Mourinho hefur verið nefndur til sögunnar sem eftirmaður Ferguson og segir Neville að það komi ekki  á óvart.

„Það eru margir góðir knattspyrnustjórar sem gætu tekið við þessu starfi og það kemur ekki á óvart að nafn Mourinho sé nefnt í því samhengi. Hann hefur náð árangri og hann er sterkur persónuleiki. Hann er góður í því sem hann gerir en ég tel að það sé tímasóunn að vera að hugsa um slíka hluti núna. Sir Alex hefur aldrei verið betri og hann á nokkur ár eftir,“  sagði hinn 36 ára gamli Neville sem lagði skóna á hilluna í síðasta mánuði eftir að hafa leikið með Man Utd í tvo áratugi.

Mourinho hefur ítrekað lýst því yfir að hann hafi áhuga á að snúa aftur í ensku úrvalsdeildina en hann náði frábærum árangri með Chelsea.