Dirk Kuyt með þrennu í 3-1 sigri Liverpool á Manchester United

Dirk Kuyt skoraði sína fyrstu þrennu fyrir Liverpool þegar liðið vann öruggan 3-1 sigur á toppliði Manchester United á Anfield í dag í stórleik helgarinnar í ensku úrvalsdeildinni.

Liverpool-maður hafði ekki skorað þrennu á móti erkifjendunum í Manchester United síðan að Peter Beardsley skoraði þrennu í 4-0 sigri Liverpool á Anfield í september 1990. Þá líkt og nú sat Kenny Dalglish í stjórastólnum hjá Liverpool.

Manchester United átti möguleika á því að ná sex stiga forskoti á Arsneal en nú munar aðeins þremur stigum á liðunum. United var þarna að tapa sínum öðrum leik í röð og hefur jafnframt tapað þremur af síðustu fimm leikjum sínum í ensku deildinni.

Þetta er þriðja árið í röð sem Liverpool vinnur Manchester United á Anfield en liðið vann 2-0 í fyrra og 2-1 tímabilið þar á undan.

Luis Suarez átti eins og Kuyt stórleik í Liverpool sókninni en hann átti stóran þátt í öllum þremur mörkunum. Vinnusemi félaganna var líka til mikillar fyrirmyndar og gerðu þeir United-mönnum lífið leitt í allan dag.

Leikurinn byrjaði leikinn frábærlega og Luis Suarez fór illa með dauðafæri eftir aðeins þriggja mínútna leik eftir að hafa fengið sendingu frá Raul Meireles. Liverpool byrjaði leikinn mun betur en Dimitar Berbatov komst næst þó að skora þegar hann skaut í stöngina á 16. mínútu.

Luis Suarez var í miklum ham í fyrri hálfleiknum og á 34. mínútu fór hann framhjá hálfu Manchester United liðinu áður en hann sendi boltann framhjá Edwin van der Sar. Boltinn var á leiðinni í markið þegar Dirk Kuyt sparkaði honum í markið af marklínunni.

Suarez var ekki hættur að rugla varnarmenn United í ríminu því eftir fyrirgjöf frá honum gerði Nani þau risa mistök að skalla boltann aftur inn í markteiginn þar sem Dirk Kuyt var dauðafrír og skallaði boltann í markið. Liverpool var því komið í 2-0 eftir 39 mínútur og með öll tök á leiknum.

Það ætlaði allt að sjóða upp úr í lok fyrri hálfleiks þegar Jamie Carragher fékk gult spjald fyrir brot á Nani. United-menn vildu fá rautt en Nani var borinn af velli og spilaði ekki meira í leiknum. Rafael svaraði með tveggja fóta tæklingu á Martin Skrtel sem brást illa við. Þeir fengu báðir gult.

Manchester United byrjaði seinni hálfleikinn af miklum krafti og tók öll völd á vellinum. Raul Meireles bjargaði á marklínu frá Dimitar Berbatov á 59. mínútu og skömmu síðar fékk United aukaspyrnu á stórhættulegum stað en Ryan Giggs átti þá slakt skot yfir.

Liverpool stóðst áhlaup United og Dirk Kuyt innsiglaði síðan þrennuna sína og kom Liverpool í 3-0 á 65. mínútu. Kuyt var þá enn á ný á réttum stað þegar hann fylgdi á eftir þegar Edwin van der Sar hálfvarði fasta aukaspyrnu frá Luis Suarez.

Andy Carroll kom inn á sem varamaður fyrir Raul Meireles á 74. mínútu í sínum fyrsta leik síðan Liverpool keypti hann á 35 milljónir punda.

Liverpool var með góð tök á leiknum eftir að þeir komust í 3-0 og fengu nokkur færi til þess að bæta við mörkum. Það var hinsvegar Manchester United sem minnkaði muninn í uppbótartíma þegar Javier Hernández skallaði boltann inn eftir sendingu frá Ryan Giggs.