Cole skaut starfsmann Chelsea með loftriffli

Ashley Cole ætlar að ganga illa að bæta ímynd sína í heimalandinu en nú hefur verið greint frá því að hann hafi skotið starfsmann Chelsea með loftriffli.

Atvikið ku hafa átt sér stað fyrir viku síðan. Cole fór þá að leika sér með loftriffil sem var á svæðinu. Hann gerði sér ekki grein fyrir því að riffillinn væri hlaðinn og skaut því starfsmanninn af stuttu færi.

Fjöldi vitna var að atvikinu. Starfsmaðurinn meiddi sig mikið enda fór skotið í gegnum fötin og í líkama hans.

Þurfti hann að fá meðhöndlun hjá læknum Chelsea og fékk í kjölfarið tveggja daga frí.

Lögreglan var ekki kölluð til og samkvæmt heimildum var það til þess að félagið fengi ekki slæma umfjöllun. Chelsea hefur ekki viljað tjá sig um málið og segist ekki vilja fjalla um innri málefni félagsins.