Bjarnólfur: Leikmenn fá þessa viku til þess að sýna sig og sanna

Bjarnólfur Lárusson tók í dag við þjálfun meistaraflokks karla hjá Víkingi og hann gaf blaðamannamönnum kost á viðtali rétt fyrir fyrstu æfingu sína með liðinu nú seinni partinn. Hann tekur við liðinu af Andra Marteinssyni en liðið situr eins og er í fallsæti deildarinnar.

„Ég hef ákveðið að tala ekki opinberlega um það sem hefur gerst hjá liðinu. Þetta er bara nýr kafli á tímabilinu sem ætlum að byrja ferskir á í dag. Það eru ellefu leikir framundan og ég kvíði þessu verkefni ekki neitt," sagði Bjarnólfur sem hefur Tómas Ingi Tómasson sér til aðstoðar.

„Það er fyrsta æfing á eftir og þar mun ég meta hópinn. Það byrja allir á núllinu hjá mér og fá sitt tækifæri. Leikmennirnir fá þessa viku til þess að sýna sig og sanna fyrir okkur. Þar kemur í ljós hvort menn ætla að vera í skipinu eða ekki," segir Bjarnólfur.

„Það var leitað til mín í fyrra og þetta hefur borið á góma annars lagið. Ég hef ekki verið að leitast eftir því en þetta er einstakt tilvik. Það er örugglega aldrei létt að byrja því þetta er alltaf krefjandi og skemmtilegt starf. Mér finnst þetta rosalega spennandi starf og ég veit að við munum koma úr þessu verkefni stoltir af okkar vinnu eftir sirka tvo mánuði," sagði Bjarnólfur og bætti við:

„Verkefnið er að tryggja veru liðsins í efstu deild á næsta ári og fyrir næstu ár. Það er bara verkefnið og okkur mun takast það, sagði Bjarnólfur en nánar verður rætt við hann í Fréttablaðinu á morgun.