Hargreaves: Get spilað 40 leiki í vetur

Owen Hargreaves er þess fullviss að hann muni koma mörgum í opna skjöldu þegar hann muni loksins byrja aftur að spila fótbolta.

Hargeaves hefur mátt glíma við þrálát meiðsli undanfarin þrjú ár og lítið sem ekkert getað spilað. Skemmst er að minnast þess þegar hann var óvænt í byrjunarliði Manchester United gegn Wolves á síðustu leiktíð en þurfti að fara af velli eftir aðeins nokkrar mínútur.

Hann er nú laus allra mála hjá United og hefur enska úrvalsdeildarfélagið West Brom boðið honum samning.

Hargreaves og læknar hans eru þó sannfærðir um að hann hafi nú náð sér loksins góðum af þeim hnémeiðslum sem hafa plagað hann svo lengi.

„Ég mun koma öllum í opna skjöldu. Ég ætla að koma til baka því ég hef fulla trú á því að ég geti spilað jafn vel og ég gerði áður. Mér líður vel og hnén eru fullkomin,“ sagði Hargreaves við enska fjölmiðla.

„Ég hef ýmislegt að sanna enda telur fólk að ég sé bara dauður og grafinn. Ég hef fullan skilning á því.“

„Ég ætla þó ekki að fara fram úr sjálfum mér. Ég þarf fyrst að æfa almennilega og spila nokkra leiki áður en ég leyfi mér að verða of spenntur fyrir boltanum.“

„En eins og er tel ég að ég geti vel spilað 40 leiki þetta tímabilið og að ég geti æft á hverjum degi geri ég það rétt. Ég vona að ég geti komist aftur í enska landsliðið fyrir EM næsta sumar. Maður verður að vera metnaðarfullur.“