Dalglish hefur áhyggjur af álaginu á Suarez

Kenny Dalglish, stjóri Liverpool, hefur áhyggjur af því hversu mikið álag er á Luis Suarez og þá aðallega hversu marga leiki hann þarf að spila með úrúgvæska landsliðinu.

Úrúgvæ hefur átt frábæru gengi að fagna á undanförnum árum. Liðið varð Suður-Ameríkumeistari í sumar og komst langt á HM í Suður-Afríku í fyrra.

Fyrir vikið hefur Suarez ekki fengið almennilegt sumarfrí síðan 2009 og enn á úrúgvæska landsliðið eftir að spila fimm landsleiki á árinu. Liðið mætir næst Úkraínu í æfingaleik á föstudaginn kemur.

„Við verðum að fylgjast vel með þessu,“ sagði Dalglish um málið. „Við vitum ekki nákvæmlega hvað bíður Luis með landsliðinu. Við vitum nokkurn veginn hvaða leikir eru fram undan en það hefur ekki fengis staðfest.“

„Ég get því ekki spáð því hvað muni gerast. Það væri gaman að leyfa honum að spila í hverjum einasta leik og æfa á hverjum einasta degi en það er ekki skynsamlegt.“

„En Luis mun spjara sig. Hann fékk smá frí fyrir Copa America og svo aftur eftir mótið. Við munum hvíla Luis ef hann þarf á því að halda, rétt eins og aðra leikmenn.“