Barton launahæsti leikmaðurinn í sögu QPR

Joey Barton samdi í vikunni við Queens Park Rangers og samkvæmt enskum fjölmiðlum þénar hann nú 80 þúsund pund í vikulaun. Er hann þar með orðinn launahæsti leikmaðurinn í sögu félagsins.

Vikulaun hans hjá Newcastle voru litlu minni, eða um 70 þúsund pund. Engu að síður var hann ósáttur við þann samning sem forráðamenn félagsins buðu honum síðastliðið vor og neitaði hann að skrifa undir nýjan samning.

Í kjölfarið gagnrýndi hann forráðamenn liðsins á Twitter sem leiddi til þess að honum var leyft að fara frá félaginu án greiðslu nú í sumar.

Tony Fernandes keypti í vikunni meirihlutaeign í QPR og hefur verið iðinn við að styrkja leikmannahópinn síðan þá. Luke Young samdi við félagið í gær og þá er talið líklegt að Shaun-Wright Phillips sé á leiðinni frá Manchester City.