Ferguson: Þetta kom á óvart

Alex Ferguson segir að hann eigi alltaf von á erfiðum leik þegar að Manchester United mætir Arsenal. Það var þó ekki tilfellið í dag enda vann United 8-2 sigur.

„En það verður að taka til greina að Arsenal saknaði margra leikmanna í dag,“ sagði Ferguson. „En við gerðum samt það sem þurfti að gera.“

„Við sýndum kæruleysi inn á milli og þeir náðu að skapa sér hættu enda með hættulega sóknarmenn í sínu liði. En við erum ánægðir þegar á heildina er litið - frammistaða okkar var góð í dag.“

Ferguson hefur oft mætt Arsene Wenger, stjóra Arsenal, og ber greinilega virðingu fyrir honum. „Mér finnst það ósanngjarnt að gagnrýna hann. Hann hefur unnið frábært verk fyrir Arsenal í gegnum tíðina og félagið hefur framleitt marga frábæra leikmenn undir hans stjórn.“

„Hann hefur einnig verið skynsamur þegar kemur að rekstri liðsins og því vill fólk oft gleyma. Menn geta verið dómharðir þegar lið tapar nokkru leikjum í röð.“