Nasri: Sendum skýr skilaboð með þessum sigri

Samir Nasri, leikmaður Man. City, sló heldur betur í gegn í sínum fyrsta leik fyrir félagið en hann lagði upp þrjú mörk fyrir samherja sína í sigrinum gegn Tottenham í dag, en Man. City rústaði Tottenham, 5-1, á White Hart Lane.

Nasri sagði í viðtali eftir leik að sigurinn hafi heldur betur gefið sterk skilaboð til erkifjendanna í Man. Utd. um að City ætli sér meistaratitilinn.

„Þetta var frábær byrjun fyrir mig persónulega, við unnum 5-1 á erfiðum útivelli, auk þess sem við lékum frábærlega í dag,“ sagði Nasri eftir leikinn í dag.

„Þessi sigur sendir þau skilaboð til Man. Utd. að við ætlum okkur alla leið í ár“.

„Tímabilið er rétt hafið og það er mikilvægt fyrir okkur að fá mikið sjálfstraust strax í byrjun. Ég er viss um að við séum með nægilega sterkan hóp til að vinna deildina og jafnvel fleiri titla“.