Stórfjölskylda: Á 94 börn með 39 konum

Stærsta stórfjölskylda heimsins býr í Indlandi. Fjölskyldufaðurinn á 94 börn með 39 konum.Þar sem barnabörnin eru orðin 33 talsins telur þessi stórfjölskylda í allt 181 einstakling.

Fjölskyldan býr saman í risastóru fjögurra hæða húsi með 100 herbergjum í héraðinu Mizoram sem liggur á milli Bangladesh og Burma.

Fjölskyldufaðirinn, hinn 67 ára gamli Ziona Chanas, tilheyrir sértrúarsöfnuði sem leyfir ótakmarkaðar giftingar. Chanas hefur ekki slegið slöku við í þeim efnum. Þegar giftaráhugi hans var sem mestur eignaðist hann 10 konur á einu ári. Konur hans eru á bilinu 30 til 71 árs gamlar.

Chanas segist ekki hættur að leita sér að álitlegum konum til að giftast þótt hann sé að komast á sjötugsaldurinn. Hann segir í samtali við blaðið The Sun að helst vilji hann eignast bandaríska konu næst því hann vilji kynna sértrúarsöfnuð víðar í heiminum.