Eiður sérfræðingur Sky Sports í fjarveru Andy Gray

Eiður Smári Guðjohnsen var ásamt Jamie Redknapp sérfræðingur á Sky Sports-sjónvarpstöðinni í fjarveru þeirra Andy Gray og Richard Keys.

Þeir Gray og Keys komust í hann krappann í gær þegar upptöku af samtali þeirra var lekið í fjölmiðla. Þar gagnrýndu þeir að kona væri í dómarateymi leiksins sem þeir voru að lýsa, viðureign Liverpool og Wolves.

Í þættinum, Monday Night Football, var þó ekkert fjallað um atvikið umdeilda.

David Jones stýrði þættinum en hann var áður fréttaþulur á sjónvarpsstöð Sky Sports.

Í grein um málið á vef Telegraph segir að þeir Eiður og Redknapp hafi verið sannkallaðir „nútímamenn" í bæði klæðaburði og fasi.