Umfjöllun: Stjarnan vann Breiðablik með marki í uppbótartíma

Stjarnan vann magnaðan sigur, 3-2, á Breiðablik en sigurmarkið kom þegar nokkrar sekúndur voru eftir af leiknum. Garðar Jóhannsson skoraði tvö mörk í leiknum og það síðari var sigurmarkið.

Stjörnumenn sóttu án afláts í byrjun leiks og hreinlega óðu í færum. Garðar Jóhannsson, leikmaður Stjörnunnar, náði í byrjun leiks góðu skoti að marki Blika sem Ingvar Þór Kale varði frábærlega.

Jóhann Laxdal fékk stuttu síðar boltann fyrir utan teig og þrumaði honum á markið og aftur varði Ingvar frábærlega í marki Breiðabliks. Breiðablik hefði auðveldlega geta lent 2-0 undir eftir tíu mínútna leik en markið lá heldur betur í loftinu.

Þremur mínútum síðar náðu Stjörnumenn að komast yfir þegar Daníel Laxdal skoraði glæsilegt mark. Halldór Orri Björnsson lyfti boltanum inn fyrir vörn Blika, þar var Daníel mættur og stýrði boltanum í netið. Heldur betur sanngjörn staða og Blikar ekki mættir til leiks.

Breiðablik náði hægt og rólega að stimpla sig inn í leikinn næstu mínútur og náðu að jafna metin rétt fyrir lok fyrri hálfleiks. Dylan Macallister skoraði flott mark eftir frábæra sendingu frá Arnari Má Björgvinssyni, en hann tók boltann á lofti og hamraði honum í netið af stuttu færi. Staðan því 1-1 í hálfleik eftir skemmtilegan fyrri hálfleik.

Síðari hálfleikurinn byrjaði aðeins rólegra en sá fyrri og liðin voru nokkuð lengi í gang, en eftir tuttugu mínútna leik í síðari hálfleik náðu Blikar að komast yfir. Daníel Laxdal var fyrir því áláni að skora sjálfsmark. Arnar Már Björgvinsson, leikmaður Blika, átti fínan sprett upp hægri vænginn, gaf fyrir þar sem Daníel fékk boltann í sig og þaðan í netið.

Virkilega óheppilegt fyrir Garðbæinginn sem hafði átt góðan leik fram að markinu.

Leikurinn dofnaði heldur næstu mínútur en heimamenn gáfust aldrei upp og héldu áfram að berjast.

Tíu mínútum fyrir leikslok náði Garðar Jóhannsson að jafna leikinn með marki úr skalla eftir magnaða fyrirgjöf frá Bjarka Páli Eysteinssyni. Lokamínúturnar voru æsispennandi og allar blikur á því að sigurmarkið kæmi sem og það gerði á 93. mínútu leiksins þegar Blikar gerðu sig seka um skelfileg varnarmistök.

Finnur Orri Margeirsson, miðvörður Blika, reyndi að hreinsa boltann út úr teignum með þeim afleiðingum að hann beint á kollinn á Garðari Jóhannssyni sem þurfti aðeins að stýra boltanum í netið. Stjarnan náði að tryggja sér frábæran sigur og eru komnir með 18 stig í deildinni.



Stjarnan 3 – 2 Breiðablik

1-0 Daníel Laxdal (12.)

1-1 Dylan Macallister (43.)

1-2 Jóhann Laxdal, sjálfsmark (65.)

2-2 Garðar Jóhannsson (80.)

3-2 Garðar Jóhannsson (93.)

Skot (á mark): 10 – 5 (7-4)

Varin skot: Ingvar 4 – 4 Ingvar

Horn: 4 – 5

Aukaspyrnur fengnar:12– 7

Rangstöður: 4-7

Dómari: Þorvaldur Árnason 8