Horft aftur til fortíðar í veiði

Nú stendur til að endurvekja grásleppuútgerð í Grímsstaðavör við Ægissíðu í Reykjavík. Kjartan Magnússon, borgarfulltrúi Sjálfstæðisflokksins, lagði fram tillögu í menningarmálanefnd árið 2006 um endurvakningu útgerðarinnar og friðun grásleppuskúranna, þegar stóð til að jafna þá við jörðu.

Skúrarnir við Ægissíðu eru elstu minjar um smábátaútgerð í Reykjavík og segir Kjartan að afar mikilvægt sé að varðveita þá. Innviðir skúranna hafa nú verið gerðir upp og lýsingu komið fyrir en ytra útliti er haldið óbreyttu og segir Kjartan það vera til þess að varðveita svæðið í eins upprunalegri mynd og mögulegt er.

Auk grásleppuútgerðarinnar verður komið upp aðstöðu fyrir útikennslu grunnskóla í skúrunum og þjónustu fyrir ferðamenn. Skúli Guðbjörnsson hefur keypt Skálabátinn, tíæring frá Færeyjum, og hyggst sigla á honum út flóann að Álftanesi með ferðamenn í haust og vetur og leyfa þeim að upplifa grásleppuveiðar eins og þær tíðkuðust á árum áður.

Þrjátíu fornar varir eru í Reykjavík þar sem róður og útgerð tíðkuðust á árum áður. Útræði er hætt úr þeim öllum og víðast hvar hefur verið fyllt upp í þær.- sv