Völvan spáir stjórnarslitum, óeirðum og byltingu

Upplausn verður við stjórn landsins, ríkisstjórnin springur og einnig sú sem tekur við og bylting verður í þjóðfélaginu, af slíku tagi að búsáhaldabyltingin verður barnaleikur einn í samanburðinum. Þetta segir Völva vikunnar um árið sem senn gengur í garð.

Völvan er sum sé ekki ýkja bjartsýn á þjóðfélagsástandið á næsta ári. Hún virðist telja að skammt sé í að núverandi ríkisstjórn spryngi - en þá taki við einhvers konar þjóðstjórn eða samsteypustjórn. Völvan sér hins vegar ekki að henni gangi nokkuð betur. Svo kveðst hún sjá mikla byltingu, óeirðir og læti. Fólk sem ekki hafi mótmælt áður fari að láta í sér heyra. Hún sér þó ekki skrílslæti heldur eðlileg mótmæli þeirra sem séu búnir að fá sig fullsadda af ástandinu. Orðrétt bætir hún við að ekki virðist mega höggva nærri aðalmeininu, nú sé verið að hjálpa stóreignafólki og fyrirtækjum en skuldsetja almúgann enn meira. Þess vegna rísi fólkið upp og geri byltingu. Yfirgengileg skattheimta verði líka ein ástæða þess að fólk sætti sig ekki við ástandið. Lágmarkslaun séu alltof lág og fjöldi fólks kjósi heldur að vera áfram atvinnulaus.

Hún finnur ekki fyrir jafnvægi í þjóðfélaginu fyrr en árið 2012 - þó verði einhver uppbygging á komandi ári þrátt fyrir sterk niðurrifsöfl. Hún spáir einnig átökum og innanflokksdeilum hjá öllum fjórflokknum. Hreyfingin eigi eftir að fjara út en nýtt framboð komi fram, framboð fólksins. Þá spáir völvan því að Lilja Mósesdóttir, sem enn er í Vinstri grænum, verði með í þessu nýja stjórnmálaafli. Og tíma Jóhönnu Sigurðardóttur lýkur - hún hrökklist frá völdum

En sums staðar í spánni örlar á eilítilli bjartsýni. Hún spáir því meðal annars að miklir peningar eigi eftir að finnast, peningar faldir á stöðum þar sem ekki hafi verið leitað áður. Sá fjársjóðsfundur verði algjör sprengja framan í almenning, og peningarnir séu nær en við höldum.