Landlæknir kannar sérstaklega ávísanir á rítalín til fullorðinna

Geir Gunnlaugsson, landlæknir, hyggst kanna sérstaklega ávísanir lækna á rítalín til fullorðinna. Hann segist vilja skoða hvort forsendur séu fyrir því að takmarka ávísanir á lyfið, en mikið framboð er af rítalíni í undirheimum.

Þórarinn Tyrfingsson, yfirlæknir á Vogi, sagði í kvöldfréttum okkar á laugardag að læknar hefðu ávísað rítalíni í óhófi, en lyfið er eitt eftirsóttasta vímuefnið á hinum ólöglega vímuefnamarkaði. Þórarinn vill endurskoða ávísanir á lyfið til fullorðsins fólks, en talið er að stærstur hluti þess rítalíns sem er á markaði séu efni sem læknar hafi ávísað.

Geir Gunnlaugsson, landlæknir, hefur almennt eftirlit með ávísunum lækna. Geir segist fullviss um að í flestum tilvikum sé verið að ávísa lyfinu í því skyni að það gagnist sjúklingnum best, en í einhverjum tilvikum séu einstaklingar að fá rítalín sem ekki þurfi á því að halda.

„Það sem við getum gert er að skoða lyfseðilsútskriftir einstakra lækna, notkun einstakra notenda og kafa dýpra í neyslu þeirra og útskriftarvenjur. Það er eitt sem við munum skoða og ætlum að gera og er í vinnslu innan embættisins," segir Geir.

„Við munum skoða og erum með umræðu innan embættisins um að skoða sérstaklega notkun hjá fullorðnu fólki. Það kemur ýmislegt til greina, t.d á hvaða forsendum eru einstaklingarnir á slíkum lyfjum, hvernig notkun hefur verið og hvort nauðsynlegt sé að halda henni áfram til langs tíma eins og mörg dæmi sýna. Við munum sjá til þess að þessi lyf verði ekki misnotuð, en þetta er erfitt mál og á bak við hvern einstakling sem er á þessu lyfi er ákveðin saga," segir Geir Gunnlaugsson, landlæknir.