Ritalinneyslan líkist faraldri

Landlæknir segir að verið sé leita leiða til að draga úr mikilli misnotkun fullorðinna á lyfinu rítalíni. Yfirlæknir á Vogi líkir þróuninni við faraldur og segir lækna hafa ávísað lyfinu í óhófi. Heilbrigðisráðherra vill taka á málinu hið fyrsta.

Ritalín er eitt eftirsóttasta vímuefnið á hinum ólöglega markaði. Þetta er fyrirsögnin á nýjum pistli Þórarins Tyrfingssonar yfirlæknis SÁÁ, á síðu samtakanna.

Þórarinn segir að tölur frá Sjúkrahúsinu Vogi og könnun á örvandi vímuefnaneyslu sjúklinganna sem hafa leitað sér meðferðar á þessu ári sýni svo ekki verður um villst að ávísun lækna á lyfið ritalín verði að endurskoða.

Þórarinn segir að á árunum 1995 til 2000 hafi faraldur ólöglegrar amfetamínneyslu vaxið gríðarlega. Á sama tímabili hafi verið svokölluð létt hömlun á ávísun lækna á amfetamín og skyld efni og sölutölur hafi þá rokið upp.

Eftir bankahrun hefur dregið úr framboði á ólöglegum vímefnum en rítalínneysla aukist enn og unnið upp þá minnkun sem varð á ólöglegu amfetamíni.

Til að skoða þessar breytingar betur var hrundið af stað viðamikilli upplýsingasöfnun og í ljós kom að af þeim fyrstu sex hundruð einstaklingum sem komu á Vog á þessu ári voru 429 sem notuðu örvandi vímefni og 109 sprautuðu efnunum í æð.

Um 60 prósent þeirra sem sprautuðu sig með örvandi efnum sögðu ritalín vera það efni sem þeir noti mest eða næstmest. Fólkið segist sprauta sig 10 til 20 sinnum á dag og nota tugi taflna daglega.

Magnið er því mjög mikið.

Þegar fréttastofa ræddi við Geir Gunnlaugsson, landlækni í dag sagði hann að embættið væri með málið til skoðunnar. Stefnt væri að því að koma með tillögur til úrbóta á næstu vikum. Hann tekur í sama streng og Þórarinn um að nauðsynlegt sé að fara yfir ávísanir lækna með því markmiði að koma í veg fyrir misnotkun.

Þá segir Þórarinn hafa fengið þau svör frá heilbrigðisráðherra að taka eigi á þessum málum sem allra fyrst.