Endurskoða verður ávísun lækna á rítalín

Samtök áhugafólks um áfengis- og vímuefnavandann segja að tölulegar upplýsingar frá Vogi og könnun á örvandi vímuefnaneyslu sjúklinganna sýni að endurskoða verði ávísun lækna á lyfið rítalín.

Þórarinn Tyrfingsson, yfirlæknir á Vogi, segir í pistli á vefsíðu SÁÁ að á árunum 1995 til 2000 hafi faraldur ólöglegrar amfetamínneyslu vaxið gríðarlega og nýir neytendur efnisins hafi verið mjög ungir og verið að leita sér meðferðar í fyrsta sinn. Inn í amfetamínfaraldurinn hafi síðan komið kókaín og e-töflur og það hafi orðið sífellt algengara að sjúklingar sem hafi komið til meðferðar hafi farið úr einu örvandi efni í annað eftir efnum og aðstæðum.

Einmitt á þessum árum, 1995-2000, hafi verið svokölluð létt hömlun á ávísun lækna á amfetamín og skyld efni og sölutölur hafi þá rokið upp. Þórarinn segir að á fyrstu árum þessarar aldar hafi sjúklingum sem sprautuðu rítalíni í æð fjölgað mikið og margir þeirra leitað á Vog. Sjúklingarnir hafi sagt fíkn sína í efnið sterkari en í flest önnur vímuefni.

Eftir bankahrunið minnkaði framboð á ólöglegum vímefnum en rítalínneysla jókst og vann upp þá minnkun sem varð á ólöglegu amfetamíni. Til að skoða þessar breytingar betur var hrundið af stað viðamikilli upplýsingasöfnun og í ljós kom að af þeim fyrstu sex hundruð einstaklingum sem komu á Vog á þessu ári voru 429 sem notuðu örvandi vímefni og 109 sprautuðu efnunum í æð.

Sextíu prósent þeirra sögðu rítalín það efni sem þeir notuðu mest eða næstmest. Þeir sögðust sprauta sig 10-20 sinnum á dag og nota tugi taflna daglega. Þórarinn Tyrfingsson segir þessa tölfræði beri að taka alvarlega og að hún sýni að endurskoða verði ávísun lækna á lyfið rítalín.