Mun ekki hygla höfuðborgarsvæðinu

Ögmundur Jónasson segir að það skipti ekki máli að ráðherra samgöngumála komi nú fyrsta sinn í áratugi frá höfuðborgarsvæðinu því hann beri ekki síður hag landsbyggðarinnar fyrir brjósti.

Ögmundur tók í dag við sem samgöngu- og sveitarstjórnarráðherra og dómsmála- og mannréttindaráðherra. Aldrei áður hefur samgönguráðherra komið frá höfuðborgarsvæðinu ef frá er talið þegar Magnús Torfi Ólafsson gegndi embætti samgönguráðherra sumarið 1974, líkt og borgarfulltrúinn Gísli Marteinn Baldursson rifjar upp á heimasíðu sinni.

Spurður hvort það komi til með að hafa breytingar í för meðs sér fyrir íbúa höfuðborgarsvæðsins að samgönguráðherra komi nú frá sama svæði segir Ögmundur: „Ég fullyrði að það skiptir engu máli. Ég ber ekkert síður hag landsbyggðarinnar fyrir brjósti en þéttbýlisbúa hér á Suðvesturhorninu eiginlega nema síður sé. Að mörgu leyti er dreifbýlið háðara samgöngum og á erfiðara uppdráttar ef að samgöngur eru í lamasessi. Við hér erum þó komin með alltraust og öflugt kerfi."

Ögmundur vill ekki segja til um það hvort afstaða forvera hans hafi verið sú sama.



Óeðlilegur samanburður

Á heimasíðu sinni bendir Gísli Marteinn á að á höfuðborgarsvæðinu búi 70% landsmanna en samkvæmt samgönguáætlun til ársins 2012 fari einungis 15% fjármagsins til framkvæmda á umræddu svæði.

Spurður hvort það sé eðlileg skipting segir Ögmundur: „Ég veit ekki hvort það er eðlilegt að tengja þetta hlutfallslega við íbúðafjölda. Það eru margar breytur sem koma til sögunar sem gera slíkan samanburð vafasaman svona við fyrstu sýn."