Vara við svikasímtölum í nafni Sig­ríðar Bjarkar

Í tilkynningu frá lögreglunnu segir að alla jafna sé hringt úr leyninúmeri. Röddin sem á að vera Sigríður Björk segist vera hringja vegna alvarlegs afbrots og spurt er hvort viðkomandi hafi þegar greitt sekt vegna málsins.

Um er að ræða svikasímtöl, ekki persónuleg símtöl frá Sigríði Björk eða lögreglunni. Tekið er fram að lögreglan innheimtir ekki sektir í gegnum síma. 

„Það er góð regla að gefa aldrei upp kortanúmer í gegnum síma og heimila ekki rafræna auðkenningu nema þú sért sjálf/ur/t að verki,“ segir í tilkynningunni.

Þeir sem telja sig hafa orðið fyrir svikum vegna þessa er bent á að hafa samband við sinn viðskiptabanka og tilkynna málið til lögreglu.

Þetta er ekki í fyrsta skipti sem slíkir svikarar þykjast vera Sigríður Björk. Töluvert var um svikapósta um tíma merktir lögreglu, ríkislögreglustjóra eða ríkissaksóknara. Þá voru send með skjöl í viðhengi þar sem einstaklingarnir voru sagðir hafa framið glæp og var gert að greiða sekt.

Sigríður Björk hefur tjáð sig um málið á Facebook þar sem hún tekur fram að áðurnefnd símtöl séu ekki frá henni heldur svikahrappar. Hún tekur fram að um margra ára skeið hafi óprúttnir aðilar sent svikabréf í hennar nafni en bréfin hafi verið sett fram á ótrúverðugan hátt og því lítil hætta að viðtakendur falli í gryfjuna.

Fréttin hefur verið uppfærð.