Grétar Rafn og Eiður Smári á bekknum

Grétar Rafn Steinsson og Eiður Smári Guðjohnsen eru báðir á varamannabekk sinna liða í leikjum þeirra í ensku úrvalsdeildinni í dag.

Bolton mætir Blackpool og má Grétar sætta sig við að sitja á bekknum þar sem að stjóri liðsins, Owen Coyle, breytir aldrei sigurliði. Bolton hefur unnið tvo leiki í röð en Grétar átti við meiðsli að stríða fyrr í mánuðinum og datt því úr liðinu á versta tíma.

Eiður Smári er sem fyrr á bekknum hjá Stoke sem tekur á móti Manchester City í dag. Kenwyne Jones og Ricardo Fuller eru í sókninni hjá Stoke.

Heiðar Helguson er á bekknum hjá QPR sem mætir Cardiff í toppslag B-deildarinnar. Heiðar datt einnig úr liðinu vegna meiðsla en hafði, rétt eins og Grétar Rafn, spilað vel fyrir meiðslin.

Ívar Ingimarsson og Brynjar Björn Gunnarsson eru frá vegna meiðsla og því ekki með Reading sem mætir Leeds í dag.

Aron Einar Gunnarsson er í byrjunarliði Coventry sem mætir Scunthorpe.

Jóhannes Karl Guðjónsson er á bekknum hjá Huddersfield sem mætir Macclesfield í ensku bikarkeppninni.

Allir þessir leikir hefjast nú klukkan 15.00.